Jarge Japut Din (জারগে জৗপুঃৎ দিন) Santali Poem in Bengali- Nathaniyal Murmu
জারগে জৗপুঃৎ দিন
পারমেনা নিত্ বৗইসৗক্ ঝেঁট্
সেতোং চান্দোকিন,
সেটেরেনা হানে জারগে জৗপুঃৎ
জারগে জৗপুঃৎ দিন
রিমিল খনাঃ দাঃক্ ঝারঝার
ঞুরোঃকানতে সানাম আহার
পেরেঃচ্ কেদায় বৗদ বৗইহৗড়
সানাম তিন তুকিন
সেটেরেনা নিত্ জারগে জৗপুঃৎ
জারগে জৗপুঃৎ দিন ।।
সকড়া সডোঃক্ গাডারে আতুঃক্
জৗড়িদাঃক্ হাদহাদ
অনা দাঃকরে পায়রা এনেঃচ্
হাকোয়াঃক্ আডি সাদ ।
পায়রা রাকাঃপ্ আঁড়গোনাকো
কৗটিঃচ্ লৗটু আয়মা হাকো,
বাঙকো দিসৗই হররে মেনাঃক্
কেঁওটা জাল মুহিন
হৗলৗ হৗইহুই । সেটেরেনা অনা
জারগে জৗপুঃৎ দিন ।।
গঃক্ কেঃৎতে নিজাঃক্ নাহেল
মোহণ্ডায়েনাকো চাষা
বাতকানা অনকো লাগিৎ
সিয়োঃক্ লৗগিৎ হাসা ।
কৗমিকো রেয়াঃক্ পাড়াওয়েনা হুড়
খেতরে কামিকো উদুড় ধুপুড়
সেরেঞ্ তুলুঃচ্ হোড়োকো রহয়
হিঁড়িঞাক হাঁসগে বিন্ মুলিন,
হৗলৗ রৗস্কৗ জারগে জৗপুঃৎ
জারগে জৗপুঃৎ দিন ।।
পুখরি দাঃরে বাহা উপেল
গডারে বাহা সৗপিন
জারগে রিমিল অটাং বাড়ায়
জারগে জৗপুঃৎ দিন !
হুড়র বিজলি আর জৗড়ি দাঃক্
আগুয়াকো লাদাঁ আগুইআকো রাঃক্
দিনিসৗ মনরে বিহুর হিজুঃক্
পারমাকানাক দিন
হৗলৗ হৗই জুহি । সেটেরেনা অনা
জারগে জৗপুঃৎ দিন ।।
-নাথানিয়াল মুরমু