Nahak Onorhe Aape Chatkare (নাহাক্ অনড়হেঁ: আপে ছাটকারে) Santali Poem in Bengali -রবিলাল মাঝি
নাহাক্ অনড়হেঁ: আপে ছাটকারে
আডি মারে অনে চানখাড় পোঁড সে গুলৗজ বাহা দারে
সেদায় লেকা তেহেঞ্ হঁ চং জিওয়েৎ হেনাঃ
আয়াঃ বাহা ঞড়ম জেলেঞ হেন্দে হৗরিয়াড় সাকাম
সেলেৎ । তেহেঞ্ হঁ চঞ্ উইহৗর গেয়া এন্ হিলোঃআঃ
কুনৗমি তেরদেচ্ সাকাম রেয়াঃ ফাঁক ফাঁকতে
পারম হেচ্ আকান ইঞৗঃ আমাঃ মেঃৎ আঁহারে ।
তেহেঞ্ হঁচঞ্ উইহৗর মেয় পারম সেনঃ খৗড়িচ্
আপেয়াঃ অনা আতাং পিঁউৗ তিনৗঃ চিঁকৗড়
দুড়ুপ বাড়ায় বুঝৗঃ গৗহুল গে চং তাঁহেন উন্ দ
আপে অড়াঃ ছাটকা । তেহেঞ্ দ চেদাঃ চং
সেদায় লেকা বাং ইঞ্ সেন দাড়েয়াঃ কান্
তাড়াম তুলুচ জাঁগা ঘানে পাটেদঃ ঘানেঞ্ তহদঃ ।
তেহেঞ্ দ ওকোরা আপেয়াঃ চেগ্ গুরিচ অনা আতাং পিঁউৗ
তেহেঞ্ দ জবরা জৗড়ি তুরতুকৗ গুলৗজ বাহা বুটৗ ।
তেহেঞ্ দ চেদাঃ বাংকো রাগ মালা পতাম, কুহু চেঁড়ে
আরহঁ সাসাং পিয়ো ?
আপে ছাটকৗঞ্ তিয়োঃ লেখান তেহেঞ্ দ আডি নিশুণ
চুমুল চুমুল গিচঞ্ আটকারেদা ।
তেহেঞ্ দ ওকোরা বাং ইঞ্ আঁজম রেয়াড় মাছা আমাঃ
খুলৗসা মনেতে খাদ খাদ লাঁদা
তেহেঞ্ দ একেন কৗহিস বিছোগঃ ইঞাঃ জিউয়ি
আপে ছাটকা লেবেৎ তরা গে ।
নিশুণ আরহঁ নিশুণ ঞগঃ তেরদেচ্ হঁ পের পেডাং গে
ঞেলঃ । গুলৗজ বাহা দারে পাশেচ এ মিতৗঞ্
‘দো রুওয়ৗড়মে, আদ আলম হিজুঃ’
তেহেঞ্ দ ওকোরিঞ্ ঞেল্ ঞামমে লাঁদাওয়াতে
আপে ছাটকারে ।।
-রবিলাল মাঝি
No comments: