Kayah Hara (কয়ঃ হর) Santali Poem in Bengali -বাবুলাল মুরমু
কয়ঃ হর
সনত্ বেলা ঞাপাম রেয়াঃ
তাঁহেকান তেহেঞ্ আলাঙাঃ
কয়ঃ লেদাঞ্ হর আমাঃ
হিড়িঞ্ কাতে কৗমি সানামঃ
এন হঁ দুলৗড় ! চেকাতে চ
বাক হেচলেন মেলোমেচো ।
আমাঃ কাথা দিসৗকাতে
আডি কুসি রৗসকৗ আতে
সাফা লেদাঞ্ অড়াঃ রেয়াঃ
কনা কনা সাফা তিনাঃ
এনহঁ, দুলৗড় চেকাতে চ
বাম হেচলেন মেলোমেচো ।
সনত মৗচি সরস পালাক
বেল লেদাঞ্, দুলৗড় সারিয়ৗ
আতেন লেদাঞ্ আউরি খনাঃ
মিৎ তালা সাবাদ আমাঃ
এনহঁ, দুলৗড় ! চেকাতে চ
বাম হেচলেন মেলোমেচো ।
হালাংকাতে মিৎবার
আম ঞুতুম চেহর বেহর
গুতু লেদাঞ বাহা রেয়াঃ
মঁজ মালা আডি খনাঃ !
এনহঁ, দুলৗড় ! চেকাতে চ
বাম হেঃচলেন মেলোমেচো ।
সিঞ্ বোঁগায় হৗসুর এনা
ঞাপাম অকতে পারম এনা
আলম হুদিসা নংকা দরে
মিনৗঞ্ গেয়া কয়ঃ হররে
এনহঁ, দুলৗড় ! চেকাতে চ
বাম হেচলেন মেলোমেচো ।
অকতে নিত ঞাপামঃ আ
বাং ঞামঃ আ, আডি মঁজাঃ
ঞিদা চাঁদোয় অকা আকান
ইপিল হঁকো, চোকো আকান ।
এনহঁ, দুলৗড় ! চেকাতে চ
বাম হেচলেন মেলোমেচো ।
বাডায় কেদাঞ্ আডি আমাঃ
গরব মেনাঃ রূপ রেয়াঃ
কুকমু কানা নোআ আউড়িয়াঃ
রূপ-বাহা গস চাবাঃ ।
এনহঁ, দুলৗড় ! চেকাতে চ
বাম হেচলেন মেলোমেচো ।
জুওয়ৗন অকতে সেরমা রিমিল
অটাং আদঃ পিরিল পিরিল
সিরি সৗটি অৗরি অৗডি সরস
হড়মো দুলৗড় বেনা হাসা
এনহঁ, দুলৗড় ! চেকাতে চ
বাম হেচলেন মেলোমেচো ।
-বাবুলাল মুরমু
No comments: